Per entant restan il minister da sanadad Alain Berset ed il Cussegl federal tar la recumandaziun da purtar ina mascrina en il traffic public, sch'igl ha blera glieud e la distanza na po betg vegnir tegnida en. Ma tar las mascrinas dettia anc ulteriuras discussiuns che spetgian els. Tenor il president dals directurs da sanadad chantunals, Lukas Engelberger da Basilea-Citad, na funcziuneschia quai anc betg bain avunda.
Coordinaziun permanenta
Ils chantuns possian decider in obligatori da purtar mascrinas. La situaziun speziala dad uss lubeschia quai. Dapi la fin da la situaziun extraordinaria è questa cumpetenza puspè tar ils singuls chantuns. Mesiras ston dentant vegnir discutadas cun l'Uffizi federal da sanadad. Plinavant duai dar decisiuns be en coordinaziun cun auters chantuns. Confederaziun e chantuns han perquai decidì da s'inscuntrar ina giada il mais, ha declerà Berset davant las medias.
La taskforce da Covid-19 cusseglia er gia dapi l'emna passada da far obligatoric il purtar mascrinas en il traffic public – ed er en il spazi public nua ch'i vegn grev da suandar las chadainas d'infecziun, sco quai ch'igl è gia obligatoric tar demonstraziuns.
35 novs cas
Ina rolla centrala gioga anc adina il contact tracing, pia da pudair suandar las chadainas d'infecziun. Gidar duai qua er la SwissCovid app. Tenor Berset hajan fin uss radund 10% da la populaziun telechargià l'app.
Glindesdi ha il BAG annunzià 35 novas infecziuns cun il coronavirus. En tut hai dà fin uss 31'652 infecziuns confermadas cun il virus. Mortas èn fin uss 1'682 persunas ch'eran testadas positiv sin il virus.
