Trais scenaris
La situaziun epidemiologica saja sa meglierada en Svizra, constatescha il Cussegl federal. Ins stoppia dentant vinavant dar adatg. Surtut la varianta Delta stoppian ins tegnair en egl.
Per l’atun e l’enviern ha la regenza perquai elavurà trais pussibels scenaris:
- Las cifras restan bassas: Ord motivs stagiunals creschan las infecziuns, il sistem da sanadad na vegn dentant betg strapatschà pli ferm. En quel cas vegnissan las mesiras abolidas cun il temp – la pandemia fiss a fin.
- Las cifras creschan: Il pli tard l’atun u l’enviern datti marcantamain dapli cas da corona. In motiv perquai pudessan esser persunas betg vaccinadas u las consequenzas da las schluccadas. Il sistem da sanadad vegn strapatschà pli ferm. En quel cas prendess il Cussegl federal puspè mesiras da basa sco obligatoris da mascrina u reglas da distanza.
- Novas variantas dal virus: En il terz scenari vai per variantas dal virus, nua che la vaccinaziun na protegia betg bain avunda. Sch’i vegnan scuvridas da quellas mutaziuns, ston ins quintar cun ina nova unda. La Confederaziun prendess en quel cas mesiras strictas.
Focus sin segund scenari
Il segund scenari stat en il center da la planisaziun dals proxims mais. Sin la Confederaziun ed ils chantuns spetgian intginas sfidas. Dad ina vart saja la sfida da chattar uschè svelt sco pussibel novas variantas, hai num en la communicaziun. La Confederaziun vul perquai – en collavuraziun cun ils chantuns – rinforzar il monitoring ed il sistem da controlla per chattar novas variantas.
Plinavant cuntinuescha la campagna da vaccinar. Alain Berset quinta che mintga persuna vegnia pli baud u pli tard en contact cun il virus. Sche las cifras s'augmentassan l'atun, stettia quai probablamain en connex cun persunas betg vaccinadas.
Igl è impurtant che mintgina e mintgin che vul, survegn ina vaccinaziun.
Ina vaccinaziun cumpletta protegia per var 12 mais. Perquai vul la Confederaziun preparar uschenumnadas «vaccinaziuns da rinfrestgar» – pia vaccinaziuns per prolungar l’effect da protecziun.
Certificats da Covid
Actualmain na valan ils certificats da Covid da la Svizra anc betg en l'Uniun europeica. Quai saja actualmain dentant mo ina decisiun formala davart l'UE. La Svizra haja adattà intginas basas legalas. Cura che l'UE decida, n'è dentant anc betg enconuschent.
Quatter milliuns dosas per Covax
Il Cussegl federal ha decidì da dar quatter milliuns dosas da vaccin al program Covax. Quai è in program per furnir vaccinaziuns a pajais da svilup. Tenor Alain Berset saja quai ina contribuziun impurtanta per la sanadad mundiala. Las dosas che la Svizra dat vinavant èn dad AstraZeneca. La Confederaziun ha total 5,4 milliuns dosas da quel vaccin – dentant n'è quel anc betg lubì en Svizra.
