Lukas Engelberger, il president da la Conferenza svizra da las directuras e dals directurs chantunals da sanadad GDK, sustegna l’offensiva da vaccinar dal Cussegl federal. Quai ha el declerà envers la «Sonntagszeitung».
Offensiva betg mo legitim, mabain necessari
La vaccinaziun saja la suletta via ord la crisa, uschia Engelberger. E la Svizra saja fin uss en sia campagna stada fitg precauta e cun plain resguard. En vista da la grondezza dal problem e la situaziun dals fatgs na saja quai betg be legitim, mabain era necessari dad ir communablamain en l'offensiva. I na dastgia betg pli esser in tabu da s'engaschar per la vaccinaziun. In'obligaziun da certificat per il plaz da lavur sco en auters pajas, va per Engelberger memia lunsch. Per il temp liber saja ina obligatori giustifitgà, perquai ch'ins possia impedir infecziuns.
Campagna da vaccinar
Il Cussegl federal planisescha in’offensiva da vaccinar ensemen cun ils chantuns. Quai tranter auter cun in'emna da vaccinar naziunala, ulteriurs 170 posts da vaccinar mobils, offertas d'infurmaziun persunalas e cun bons da 50 francs per persunas che vegnan da persvader autras da sa laschar vaccinar. Questas propostas ha el tramess en consultaziun. Custar duaja l'entira offensiva 150 milliuns francs. Definitivamain decider vul il Cussegl federal ils 13 d’october.
Ord l'archiv
A partir dals 13.09.2021 vala l'obligatori dal certificat schlargià. Tgi che vuless per exempel ir endadens en ina ustaria a magliar, sto mussar il certificat.
