Sch'i dess in vaccin effizient encunter corona sa laschass il mument mintga segunda persuna vaccinar en Svizra. Quai mussa ina retschertga che la «Sonntags Zeitung» ha publitgà.
Dals dumandads sa laschassan 54% vaccinar, 41% fissan encunter ina vaccinaziun e 5% èn indecis. En general èn umens pli savens pronts per ina vaccinaziun cun 61%. Tar las dunnas èn quai 48%.
Grondas differenzas tar la vegliadetgna
Da las persunas sur 65, las persunas ch'èn periclitadas il pli ferm dal virus, sa laschassan 70% vaccinar, tar quellas tranter 18 e 35 be 45%.
Sch'ins guarda sin l'orientaziun politica pon ins dir che aderents da la PVL e da la PS èn cun 65% respectiv 64% plitost pronts da sa laschar vaccinar. Dals simpatisants da la PLD fissan 61% pronts e da la PCD 59%. Tar ils verds sa laschassan anc 53% e tar la PPS anc 41% vaccinar.
Retschertga tranter 24 e 27 da settember
La retschertga è vegnida fatga la fin da settember cun radund 15'300 persunas en la Svizra tudestga, Svizra romanda ed en il Tessin. Dus terz dals dumandads èn da la Svizra tudestga, var in quart da la Svizra romanda ed il rest dal Tessin.
