- Occurrenzas grondas duain anc pli ditg mo esser pussaivlas per persunas vaccinadas u testadas negativ, pervi da la pandemia da corona.
- Da quest avis è il president da la cumissiun federala da vaccinar, Christoph Berger.
Uschè ditg che la gronda part da la populaziun saja anc senza vaccinaziun, pudessan talas occurrenzas grondas daventar lieus da «superspreader» – ha avertì l’infecziolog da l’Ospital d’uffants da Turitg. Pia ch’ina suletta persuna infectada ch’è ad ina occurrenza gronda, possia dar enavant il virus a blers auters ch’eran en ses conturn.
Tenor Christoph Berger fa in pass grond pir senn en l'ultim quartal da l'onn. Enfin lura sajan numnadamain ils blers creschids e giuvenils vaccinads. I haja num d’era persvader questas persunas da sa laschar vaccinar, che targlinan anc actualmain.
La campagna da vaccinar fa quitads al president da la cumissiun federala da vaccinar, Christoph Berger. Da las persunas tranter 60 ed 80 onns per exempel, na sajan tut tenor chantun 25 fin 35 pertschient betg vaccinads. Cun la campagna da vaccinar stoppian els uss empruvar – da vegnir da pledentar meglier questa gruppa.
