Tenor la directura da l'Uffizi federal da sanadad (BAG), Anne Lévy, sajan 37 pertschient da la populaziun creschida, vaccinads cumplainamain, 57 pertschient hajan gia survegnì ina dosa. La finamira da pudair vaccinar fin la fin da zercladur tuttas e tuts che vulan, saja uschia realistica.
En tscherts chantuns sa mussia ina tscherta saturaziun, la prontadad da sa laschar vaccinar saja dentant pli grond che spetgà. Fin che tuttas e tuts che vulan, hajan survegnì dus dosas, possia vegnir la fin da fanadur. Per ils proxims trais mais vegnian furnidas milliuns da dosas e quai cuntinuadamain.
Dapli che 2 milliuns certificats da Covid-19
Enfin oz sajan vegnids fatgs passa 2 milliuns certificats da Covid-19. Enfin la fin da zercladur duessian persunas testadas, guaridas e vaccinadas survegnir in certificat. La directura dal BAG sa mussa optimistica da bainbaud pudair laschar da la vart la pandemia sco dumagnada, appellescha però a persunas anc betg vaccinadas da s’annunziar.
Tenor Patrick Mathys, manader da la secziun superaziun da crisa e cooperaziun internaziunala dal BAG, saja era il svilup da la valur R cun 0.53 allegraivel. Quai mainia ad in regress dad infecziuns novas, la situaziun na saja dentant betg omogena en tut ils chantuns.
Quitads fetschia la varianta Delta dal coronavirus. Quella possia infectar pli spert ed haja ina resposta immunologica reducida. Mathys fa quint che 10% da las infecziuns en Svizra giajan enavos sin la varianta Delta, quai saja cumparegliabel cun la Germania, la Frantscha e l'Italia. Grazia al dumber dals cas ch’èn fitg bass hajan ins uss las capacitads per intensivar il Contact Tracing da cas nua ch'ins suspecta la varianta Delta.
Recumandaziun da vaccinar davent da 12 onns
Christoph Berger, president da la Cumissiun federala per vaccinaziuns ha infurmà davart ina recumandaziun da l’Uffizi federal da sanadad e la cumissiun federala per vaccinaziuns. Tenor quella duain era giuvenils da 12 enfin 15 onns sa laschar vaccinar. Plinavant ha el manziunà ch'ina vaccinaziun cumpletta possia proteger almain 12 mais encunter ina malsogna miaivla.
