La Credit Suisse sto sa responsar avant il Tribunal penal federal pervia da sias relaziuns tar ina rait criminala da la Bulgaria. Quella ha fatg commerzi a l'engronda cun cocain ed ha lavà daners. Dasper la banca gronda è er accusada ina da sias anteriuras cussegliadras d'investiziun ed in anteriur emploià da la banca Julius Bär, sco er dus commembers da la rait criminala da la Bulgaria.
Tenor la procura publica duai la banda criminala avair pudì deponer ils daners or da las fatschentas cun drogas tar la Credit Suisse senza problems. Radund 146 milliuns francs sajan uschia vegnids lavads. La Credit Suisse refusa tut las renfatschas ed è era persvadida che sia anteriura collavuratura saja innocenta. Il process duai cuzzar in mais. Il chasti maximal per la banca muntass a tschintg milliuns francs. Suenter perditas da milliardas pervia da scandals da finanzas sco er l'anteriur schef che ha bandunà la banca pervi da surpassaments da reglas da corona, èn quai entaifer curt temp gia las proximas lingias grassas negativas per la banca gronda.
