- La banca gronda Credit Suisse ha sco annunzià scrit cifras cotschnas l’emprim quartal da l’onn.
- Sut il stritg ha la banca fatg in minus da 252 milliuns francs.
- Avant in onn ha il gudogn anc muntà a 1,3 milliardas francs.
D’attribuir saja quest resultat al debachel enturn il Hedgefonds american Archegos. Il colaps da Archegos surchargia il resultat cun radund 4,4 milliardas francs. En consequenza vul la banca uss rinforzar ses agen chapital.
En pli haja la banca terminà duas dispitas giuridicas en ils Stadis Unids. Quai en connex cun ipotecas marschas dal 2006. La CS paja ina mesa milliarda dollars.
FINMA prenda CS sut la marella
En connex cun la gronda perdita da la CS vegn er la FINMA, la Surveglianza federala dals martgads da finanzas, pli activa. Ella ha instradà ina segunda procedura da surveglianza cunter la banca. Quella duaja cunzunt intercurir deficits en il management da risico. Plinavant ha la FINMA prescrit mesiras immediatas a la banca: Tranter auter mesiras da reducir ils risicos, ma er reducziuns da bunificaziuns. La CS ha annunzià da cooperar stretg cun la FINMA.
