Europol, l'autoridad da persecuziun penala da la EU, ha gia avertì dad affars illegals enturn ils vaccins planisads. Uss fa quai er l'Uffizi federal da polizia fedpol.
Cugliunaders, sfalsifitgaders u criminalitad organisada – la Svizra na vegnia strusch schanegiada da quai analisescha la Fedpol. En singuls cas dettia gia oz offertas fraudulentas en connex cun il vaccin da Covid-19, avertescha il pledader da la Fedpol.
Vaccins falsifitgads e vaccins engulads
En il focus stettian il mument las chadainas da furniziun. Acturs criminals pudessan numnadamain empruvar da vegnir en il possess da vaccins originals. I pudess dentant er esser pussaivel, che vaccins falsifitgads vegnissan sin il martgà.
Per evitar quai hajan las autoritads svizras perquai decidì numerusas mesiras da segirtad. Uschia vegnia il provediment cun vaccins en in emprim pass ad ir sulettamain sur l'Armada svizra. Ils producents da vaccins furneschan tals direct da las fabricas en lieus secrets.
Fraudaders per telefon
Tenor fedpol hai er gia dà emprovas da cugliunar daners per telefon. Uschia hajan fraudaders empruvà da far pajar daners ordavant per ina vaccinaziun pli ad ura. Latiers fa fedpol attent, ch'ina vaccinaziun da corona vegnia ad esser gratuita per la populaziun en Svizra.
