Moderna, l'interpresa americana, che ha sviluppà in vaccin cunter il coronavirus, pudess furnir fitg spert las emprimas chargias a la Svizra. I dependia cunzunt da Swissmedic.
Sche l’Uffizi per la controlla da medicaments Swissmedic dat il permiss per il vaccin gia il december, lura vegnia quel era furnì il december en Svizra. Quai ha detg il schef da Moderna, Stéphane Bancel, envers la gasetta «Schweiz am Wochenende». El saja persvadì che l’uffizi examinescha intensivamain e fitg precis ils documents ch'els hajan inoltrà. In signal concret cura che l’uffizi lubeschia il vaccin per la Svizra, n'haja el dentant anc betg obtegnì.
En ils Stadis Unids da l'America tractan las autoritads la dumonda da lubir il vaccin da Moderna probablamain gia la proxima emna. L’uffizi europeic ha la seduta decisiva il pli tard ils 12 da schaner 2021. Quels pajais possedan dentant en lur uffizis equipas bler pli grondas che Swissmedic per examinar tut quai ch'è necessari per dar liber in vaccin.
Lubientscha d'urgenza
En ils Stadis Unids ha il vaccin cunter corona da las firmas Biontech e Pfizer survegnì in'admissiun d'urgenza. Igl è l'emprim vaccin che survegn glisch verda en ils Stadis Unids.
Sco emprim pajais ha la Gronda Britannia approvà la lubientscha d'urgenza per il vaccin da corona da l'interpresa tudestga Biontech e ses partenari american Pfizer. Ils 8 da december ha la Gronda Britannia cumenzà a virolar.
