Dapi che las vacanzas da stad èn a fin, datti adina dapli cas da corona en Svizra. Ina raschun per l’augment marcant èn las persunas ch’èn s’infectadas en las vacanzas cun il virus. Perquai ponderescha il minister da sanadad, Alain Berset, da puspè introducir la quarantina per persunas che vegnian en Svizra. En in’intervista cun la «NZZ am Sonntag» ha el ditg ch’ins stoppia ponderar tge che saja necessari en vista a las vacanzas d’atun. Dapi l’entschatta d’avust na ston persunas ch’entran en il pajais betg pli ir en quarantina.
Chantuns ston far dapli
Plinavant ha il minister da sanadad puspè suttastritgà quant impurtanta che la vaccinaziun saja en il cumbat cunter la pandemia. Ils chantuns stoppian anc far dapli per cuntanscher persunas che na sajan betg vaccinadas.
Extender obligatori dal certificat
L’obligatori dal certificat da Covid stoppia immediat vegnir extendì. Quai pretenda il president da la cumissiun federala da vaccinar, Christoph Berger, en la «Sonntagszeitung». Quai saja inevitabel. Il sectur da sanadad saja curt avant il limit. Il certificat duaja da nov er esser obligatoric per occurrenzas pli pitschnas, restaurants, kinos e teaters.
En pli faschessi tenor Berger senn d’examinar l’obligatori per professiuns cun stretgs contacts socials, sco per exempel per la tgira, la magistraglia u per il persunal da gastronomia.
Il Cussegl federal vul decider la mesemna en chaussa.
Ord l'archiv
