La reorganisaziun da l'Uffizi federal da duana e guardia da cunfin è problematica. Quai la critica da la cumissiun da gestiun dal Cussegl dals chantuns. Cun gia stgaffir il nov uffizi federal haja il Cussegl federal mess il parlament davant fatgs accumplids.
Per las midadas stuess ins numnadamain sco prim anc reveder la lescha da dazi. Prendì il cas ch'il parlament vuless midadas cumpareglià cun il sboz dal Cussegl federal, stuessan las structuras anc ina giada vegnir midadas e cunquai era il nov Uffizi federal vegnir adattà.
Il Cussegl federal duai uss prender posiziun enfin il settember 2022.
Ina reorganisaziun che va pe zop?
Il Cussegl federal ha decis l'onn 2019 che duanieras e guardias da cunfin duain avair il medem job. La finamira è da scolar tut las collavuraturas e collavuraturs per controllar rauba, persunas e transports e che tuttas e tuts portan in'unifurma. Cun la refurma ha era il num midà: Or da l'Administraziun federala da duana è naschì l'Uffizi federal per la duana e la segirtad dals cunfins.
Tar la consultaziun d'avant dus onns aveva ina maioritad bain beneventà questa refurma. Surtut la sanestra e la Partida verd-liberala aveva dentant crititgà che la protecziun da datas saja manglusa. Plinavant avevan ils plans d'equipar il persunals cun armas evocà la tema da militarisar la guardia da cunfin.
Uss concluda la cumissiun da gestiun: L'entira reorganisaziun ha stgaffì malruaus tar il persunal da duana. En ina retschertga dal sindicat crititgeschan collavuraturas e collavuraturs ch'il clima da lavur haja patì, ch'els na possian betg cundecider e ch'il sustegn manchia.
