Ina dumonda fundamentala da la retschertga è stada quant cuntenta che la populaziun svizra è cun sia vita en general, cun la vita privata ed era cun la vita professiunala.
Ils resultats mussan, ch'ina gronda part da la populaziun è cuntenta cun la vita en general, la media da las respostas è 7,7 – sin ina scala da 0 «insumma betg cuntent» fin 10 «cumplainamain cuntent». Be 5% n'èn insumma betg cuntents.
Tar la vita privata è la cumpart ch'è fitg cuntenta anc in zic pli auta, 66% inditgeschan in dad 8 u pli aut, cumpareglià cun 61% tar la vita generala. La differenza n'è betg fitg gronda, dentant mussan las cifras che la cuntentientscha generala dependa per gronda part da la vita privata.
La cuntentientscha tar la vita professiunala è pli pitschna, uschia inditgeschan be 37% dals dumandads e dumandadas ch'ellas èn cuntentas cun la lavur (in 7 u dapli). Quai mussa che la vita professiunala sminuescha plitost il sentiment da cuntentientscha, la vita privata auza quel. L'aut nivel da cuntentientscha general munta che la cuntentientscha generala dependa bler pli fitg da la vita privata che da la professiunala.
La cuntentientscha na dependa dentant betg mo da l'agen sentiment, mabain vegn era influenzada da facturs externs. Ils temas che fatschentan la populaziun èn ina maschaida dals temas gronds, discutads en la publicitad – sco per exempel «guerra» u «midada dal clima» – e da temas privats, sco «char sistem da sanadad» u «stil da viver persistent».
Intgins temas che vegnan discutads da la politica intensivamain na paran dentant betg d'avair tanta impurtanza tar la populaziun, sco la «neutralitad» u la «mancanza da spazi d'abitar».
Betg tut ils temas han gronda impurtanza per l'atgna cuntentientscha. Ins po per exempel esser fitg cuntent cun l'atgna vita, era sch'ins sa fa gronds quitads pervi dals gronds temas, sco la midada dal clima u la guerra. Quai mussa la grafica da l'influenza dals temas impurtants. Vul dir: La cuntentientscha persunala na vegn betg influenzada fitg dals gronds temas da noss temp. Influenza survegni be tar quels u quellas che fan part d'ina gruppaziun che collia fitg l'atgna fortuna cun in tema brisant, e ch'ha ina gronda preschientscha mediala (p. ex. «Last generation»).
Situaziun finanziala decisiva
Tar la gronda part da la populaziun n'è quai dentant betg il cas. Per ils blers ha l'atgna situaziun finanziala ina bler pli gronda influenza sin il bainstar ch'ils temas medials. Tgi che ha fadia cun las finanzas ha damain contacts socials e bler dapli squitsch persunal. In'influenza sumeglianta ha dischoccupaziun u la mancanza d'abitaziuns. Paucas persunas èn pertutgadas, l'effect da malcuntentientscha è dentant fitg ferms tar quellas. Remartgabel è era il connex tranter il squitsch da prestaziun che s'augmenta e la malcuntentientscha. In tema ch'è vegn cun raschun discutà dapli.
Sa fatschentar cun ils grond temas fa pli cuntent
Sa fatschentar cun ils gronds temas sco guerra, mancanza d'energia u la midada dal clima, auza – almain levamain – la cuntentientscha. Quai na po tenor ils auturs da la retschertga betg vegnir declerà cumplainamain. Ina tesa è ch'ins po vegnir a la conclusiun ch'i va bain cun ins sez. In'alternativa è la pussaivladad da pudair s'engaschar tar quels temas ed uschia sa sentir damain impussant.
«Co vai, Svizra?» ha era dumandà davart las relaziuns persunalas, identificaziun cun la Svizra, emoziuns ed ulteriurs temas. Las respostas chattais Vus qua:
Co vai, Svizra?
- Fan daners cuntent? Fan daners cuntent?
- Es ti cuntent cun tia relaziun? Es ti cuntent cun tia relaziun?
- Tge temas occupan? Tge temas occupan?
- Tge daletgs u plaschairs fan cuntent? Tge daletgs u plaschairs fan cuntent?
- Cura mussas tias emoziuns? Cura mussas tias emoziuns?
- Quant «svizzer» sa sentis Vus? Quant «svizzer» sa sentis Vus?