La gronda part da la populaziun na fa betg quitads pervi da la situaziun finanziala. Radund in terz ha dentant plitost gronds u schizunt gronds quitads finanzials. Qua na datti era betg grondas differenzas tranter umens e dunnas u las differentas vegliadetgnas.
Grondas differenzas datti dentant dependent da las entradas.
Tar las dumondas pli detagliadas sa mussa che la gronda part dals Svizzers e Svizras èn da l'opiniun ch'igl è grev per giuvens e giuvnas da finanziar atgna proprietad. Oravant tut ils giuvens (fin 39 onns) ed ils vegls (65+) sustegnan quella pretensiun. Ina differenza datti era tranter persunas che possedan gia proprietad e persunas che stattan a fit. Tgi ch'ha gia chasa è per 44% d'accord. Tgi che stat anc a fit è per 27% d'accord.
Ils blers èn fitg conscients cun dar ora daners. Mo radund in terz dals dumandads e dumandadas din ch'ellas cumprian chaussas ch'ellas na dovrian betg. Tar ils giuvens è la schanza ch'i cumpran uschè insatge dubel uschè gronda sco tar ils vegls.
Tessinais e Tessinaisas sa retegnan il pli fitg tar cumpras betg necessarias. Quai po avair in connex cun il fatg che pli blers da la Svizra taliana inditgeschan ch'ils daners na tanschan savens betg. Era blers Rumantschs fan blers quitads per vi da la situaziun finanziala (guarda la boxa sura). A quella dumonda han dentant be 39 persunas rumantschas dà resposta, uschia che la quota da sbagl è pli auta che tar las ulteriuras linguas.
