Siglir tar il cuntegn

Header

Il cusseglier dals chantuns Filippo Lombardi dal Tessin n’è betg vegnì reelegì.
Legenda: Al cusseglier dals chantuns Filippo Lombardi han mancà 45 vuschs per sia reelecziun. Keystone
cuntegn

Cussegl dals chantuns Filippo Lombardi ha manchentà sia reelecziun

Terratrembel politic en il Tessin: Il cusseglier dals chantuns Filippo Lombardi n’è betg vegnì reelegì. A Filippo Lombardi han mancà 45 vuschs per sia reelecziun. Il politicher da la PCD è stà durant 20 onns en il Cussegl dals chantuns per il Tessin.

Elegids da nov en la Chombra pitschna è la cussegliera naziunala social-democratica Marina Carobbio e Marco Chiesa da la PPS.
Cun quai perdan la Partida cristian-democratica e la Partida liberal-democratica lur sezs en il Cussegl dals chantuns.

Chantun Berna

Tar las elecziuns en il Cussegl dals chantuns da Berna defenda Hans Stöckli da la PS ses sez. Nov en la Chombra pitschna è Werner Salzmann da la PPS. El surpiglia il sez da la partida burgais-democratica.

Betg elegids è la presidenta dals Verds Regula Rytz e la cussegliera naziunala Christa Markwalder.

Chantun Zug

Per Zug è l’anteriur cusseglier guvernativ Matthias Michel da la PLD da nov en la Chombra Pitschna. Il cristian-democrat Peter Hegglin era vegnì confermà gia en l’emprim scrutini en sia funcziun.

Chantun Turitg

En il chantun da Turitg vegn il cusseglier dals chantuns d’enfin qua Ruedi Noser reelegì cleramain en il segund scrutini. Il politicher da la PLD ha obtegnì 65’000 vuschs dapli che la candidata dals Verds, Marionna Schlatter. Il segund cusseglier dals chantuns da Turitg Daniel Jositsch era vegnì reelegì gia en l’emprim scrutini.

Chantun Soloturn

En il chantun Soloturn vegn Roberto Zanetti da la PS reelegì. Pirmin Bischoff da la PCD era vegnì reelegì gia en l’emprim scrutini.

Chantun Son Gagl

Ed en il chantun Son Gagl vegnan Benedikt Würth e Paul Rechsteiner confermads sco cussegliers dals chantuns.

audio
Per tadlar: Terratrembel politic en il Tessin – midadas a Berna
ord Actualitad dals 17.11.2019.
laschar ir. Durada: 57 Secundas.

RR novitads 15:00+

Artitgels legids il pli savens