Siglir tar il cuntegn

Header

bancnotas svizras.
Legenda: Keystone
cuntegn

Cussegl federal Gulivaziun da finanzas federala 2020

La summa per la gulivaziun da finanzas tranter ils chantuns crescha per 61 milliuns francs sin stgars 5,3 milliardas. Il chantun Grischun survegn 3 milliuns francs dapli che quest onn. Il pli bler paja Turitg ed il pli bler survegn Berna.

Il Cussegl federal ha approvà la mesemna las summas per la gulivaziun da finanzas tranter ils chantuns da l'onn che vegn. En tut muntan quellas a 5,3 milliardas francs. Quai èn 61 milliuns francs dapli che quest onn.

Il Grischun survegn l'onn proxim definitivamain var 270 milliuns francs ord la gulivaziun da finanzas federala, quai èn 3 milliuns francs dapli che quest onn. Il pli bler paja er l'onn che vegn il chantun Turitg cun stgars 520 milliuns francs en la gulivaziun. Quai èn var 30 milliuns dapli che quest onn. Il chantun Berna survegn er il 2020 il pli bler. Cun 1,1 milliardas francs èn quai dentant var 85 milliuns francs damain che quest onn.

Spezialmain s'augmentan l'auter onn ils pajaments en la gulivaziun da resursas, nua ch'ils chantuns flaivels survegnan en total 4,3 milliardas francs. Quella summa vegn finanziada da la Confederaziun per 60% e per 40% dals chantuns cun fermas resursas.

RR novitads 15:00