La segirezza dal provediment d’electricitad da la Svizra per l’enviern 2022/2023 n’è betg periclitada en moda gravanta. Tuttina na pon stretgas da provediment betg vegnir exclusas. Quai è il facit d’in studi dal qual il Cussegl federal ha prendì enconuschientscha la mesemna.
Ils resultats confermeschian che las mesiras ch'il Cussegl federal ha concludì fin ussa han prestà ina contribuziun significanta per il provediment d’energia durant l’enviern, hai num en ina communicaziun. Uschia possia vegnir cuvrì il consum d’energia en ils scenaris ils pli probabels.
La situaziun actuala è vegnida analisada da l’Uffizi federal d’energia en accumpagnament da la cumissiun d’electricitad e da l’Uffizi federal per il provediment economic dal pajais. Els han simulà differents scenaris cun differentas disponibilitads da gas ed ovras atomaras. Igl èn er vegnidas calculadas cumbinaziuns da cundiziuns meteorologicas e da perditas d’ovras electricas.
