Siglir tar il cuntegn

Header

cuntegn

Guy Parmelin: «La crisa d'energia vegn a durar plirs onns»

La crisa d’energia vegn a durar plirs onns. Da quest fatg parta il cusseglier federal Guy Parmelin. I saja impurtant da betg mo pensar vi da quest enviern, mabain da far il necessari per che la Svizra produceschia dapli energia. Quai ha ditg il minister d’economia en in’intervista cun las gasettas da CH Media. Concret vul quai dir: dapli energia regenerabla e dapli effizienza.

Tenor ils experts da la Confederaziun saja ina mancanza da current electric fin la fin dal mars 2023 «fitg pitschna». Ils proxims dus onns vegnia la Svizra anc a depender dad ieli e gas. Co i vesia or silsuenter, dependia quant spert ch’il pajais possia augmentar la producziun tar las energias regenerablas. Ils emprims resultats da la campagna da spargnar energia sajan cuntentaivels. La populaziun saja uss sensibilisada. Er ils pretschs d'energia auts «animeschan da spargnar».

Territoris da skis

Actualmain appellescha il Cussegl federal da spargnar energia. Il medem mument vegnan fatg preparativas per ennavar bleras pistas per ir culs skis. Na saja quai nagina cuntradicziun?

Sinaquai respunda Guy Parmelin ch'ils territoris da skis stoppian – pervia dals auts pretschs d'energia – ponderar bain, tge pistas ch'els ennaveschan. Els enconuschian la relaziun tranter custs e rentabilitad. Plinavant saja als territoris er conscients ch'els na possian simplamain dumandar tar la Confederaziun per sustegn per minimar ils custs. I saja actualmain segir bun da betg turbinar tut l'aua e da tegnair reservas en ils lais da fermada, uschia il minister d'economia.

Or da l'archiv

video
Energia – Co evitar in blackout?
Or da Controvers dals 02.10.2022.
laschar ir. Durada: 25 minutas 5 Secundas.

RTR novitads 09:00

Artitgels legids il pli savens