La finamira da lur iniziativa saja fitg simpla. Pèrs maridads na duain tar la taglia betg avair in dischavantatg visavi pèrs en concubinat. Quai declera il cusseglier naziunal Martin Candinas da la partida il Center. Lur proposta cun inoltrar ina decleraziun communabla e laschar far l'uffizi da taglia duas calculaziuns saja pli effizienta che l'imposiziun da taglia individuala nua che omadus stuessan inoltrar in'atgna decleraziun. Sch'i dettia tuttenina 3 milliuns dapli decleraziuns da taglia, lura dettia quai dapli lavur da controllar. E tar famiglias saja pli grev da far las deducziuns.
Tar ina famiglia èsi cler tge deducziuns ch’ella ha da bun. Tar duas decleraziuns en ina famiglia ston ins era controllar tgi che tira giu tge.
Quai vesa sia collega grischuna, la cussegliera naziunala liberaldemocratica Anna Giacometti, tut auter. Cler portia ina midada da sistem l’emprim mument dapli lavur per l’uffizi da taglia. Ma cun l'imposiziun da taglia individuala vegnia tut pli simpel.
Sch'ina persuna cumenzia a luvrar e saja cun quai suttamessa a la taglia, lura na saja quella per regla betg maridada ed haja d'inoltrar ina decleraziun da taglia mo per ella. La gronda birocrazia dettia perquai pir cun maridar, declera Anna Giacometti.
L’uffizi da taglia sto s’adattar. E sch’ins divorziescha u sch’ins daventa vaiv u vaiva, quai che capita durant la vita, lura sto l’uffizi danovamain s’adattar. Cun cuntinuar cun l’imposiziun da taglia individuala ha l’uffizi sut il stritg pli pauca lavur.
L'iniziativa da la partida il Center vesa Giacometti fitg critic. Quella procuria mo per pli paucas entradas da taglia senza effect positiv per l'economia. L'iniziativa e la cuntraproposta a l'imposiziun da taglia individuala ch'il Parlament federal haja gia decidì animeschia percunter dunnas maridadas e bain scoladas da turnar en il mund da lavur. La lavur renda puspè e na procura – auter che tar il sistem actual – betg per ina progressiun pli auta e cun quai per in quint da taglia pli aut che mangia gist puspè davent las entradas supplementaras.
En l'iniziativa da la partida il Center vesa ella percunter in'ulteriura emprova, sco gia avant circa 10 onns, da cementar lur idea da la famiglia en la Constituziun.
In zic pli pauc concentrà sin la lètg ma ella sclauda ils pèrs en concubinat. Nus essan da l'opiniun che betg il stadi duai prescriver a la populaziun tge model da vita ch’i duain eleger. Perquai essan nus cunter l’iniziativa da la partida il Center.
Quai na saja era betg la finamira da lur iniziativa, sa defenda Martin Candinas. Ad els giaja per la chaussa.
Nus schain simplamain che famiglias u pèrs maridads na duain betg vegnir tractads mender tar la taglia che pèrs en concubinat. Quai n’è cementà nagut. Quai è procurà per gistadad tranter ils differents models da vita. I na va betg per dir tge è meglier e tge è mender.
Ils ultims onns saja vegnì fatg bler per che Svizras e Svizzers possian cumbinar meglier lavur e famiglia. Gist cun promover la finanziaziun da canortas e la tgira d’uffants ordaifer la famiglia. Ina realitad saja dentant era che famiglias sa decidian per in model da viver nua ch'ina persuna s'occupa dals uffants. Era quai duai esser pussaivel e betg vegnir chastià tar la taglia. Ma la fin finala decidia il suveran, fa Martin Candinas endament. E lez possia era decider da laschar tut sco ch'igl è.