Il Cussegl naziunal vul cumprar novs jets da cumbat per 6 milliardas francs. Cun gronda maioritad è el sa decidì d'entrar en la fatschenta – 124 cunter 68 vuschs. Tut ils detagls n'èn anc betg sclerids, ma da principi è la chombra gronda d'accord cun la cumpra.
Betg cler è anc, en tge dimensiun che las expensas duain vegnir cumpensadas entras fatschentas internas. Il Cussegl federal vuless 60%, il Cussegl dals chantuns 100%. Il Cussegl naziunal vegn a sa decider en la proxima debatta da detagl.
Protestas da la sanestra na portan betg fritg
Ils Verds han refusà la fatschenta per principi. La Svizra saja circumdada d'amis e na vegnia probabel betg attatgada da jets da cumbat, ha ditg il schef da fracziun Balthasar Glättli. Il cyberrisico saja pli grond. La proposta dals Verds da betg entrar en fatschenta ha dentant fatg naufragi cun 149 cunter 35 vuschs.
Er la proposta da renviar la fatschenta n'ha gì nagin success: Quella aveva pretendì ch'il Cussegl federal preschenta in concept alternativ pli favuraivel. Quai cun custs a maximalmain 4 milliardas francs.
RTR novitads 20:00
