In scumond da dividendas per interpresas ch’han annunzià lavur curta è giud maisa. Il Cussegl dals chantuns ha refusà ina moziun ord las retschas dal Cussegl naziunal. La Chombra pitschna ha ditg oz cun 31 cunter 10 vuschs tar ina abstenziun «Na» a la moziun. Quella aveva pretendì ch’interpresas che survegnan sustegn da la Confederaziun pervia da lavur curta, na dastgian betg pajar ora dividendas durant ils proxims dus onns.
Cuntrari al Cussegl naziunal
La Chombra gronda ha approvà ier saira cun resultat stretg ina moziun correspundenta da la cumissiun sociala. Quai cun 93 encunter 88 vuschs tar 11 abstenziuns. Las restricziuns duain er valair per interpresas ch'han gia decidì u schizunt gia pajà ora dividendas durant quest onn.
Pauc chapientscha per dividendas malgrà lavur curta
La maioritad da la cumissiun sociala dal Cussegl naziunal aveva argumentà la moziun cun las sis milliardas francs che la Confederaziun metta a disposiziun per indemnisar lavur curta. Ins na possia betg chapir sch'interpresas retiran daners per lavur curta e pajan il medem mument ora dividendas, ha ditg Mattea Meyer da la Partida socialdemocratica.
La Partida liberaldemocratica vuleva percunter refusar la moziun. Il cusseglier naziunal Marcel Dobler ha argumentà che las dividendas vegnian simplamain pajadas ora in onn pli tard.
