Malsogna e vegliadetgna. Quai èn ils dus facturs essenzials che laschan crescher ils custs socials en Svizra. A quella conclusiun vegn il rapport social da l'uffizi per statistica da quest onn, che l'Uffizi federal per statistica ha publitgà la gievgia.
Be per in onn – per il 2017 – custa la uschenumnada «segirezza sociala» 175 milliardas francs. Ed ils custs creschian vinavant, citescha la SDA il rapport.
- 42% dals custs èn d'attribuir a la populaziun che vegn adina pli veglia e 32% a malsognas.
- La quota da persunas dischoccupadas è bain restada stabila ils davos sis onns – dentant crescha il numer da las persunas, ch' èn senza lavur sur passa in onn.
- En Svizra datti adina dapli persunas povras – il 2017 sajan quai stads 8% da tut la populaziun. Radund la mesadad da quellas persunas èn persuna che lavuran.
- Quasi betg sa midada è la quota dad agid social.
Sfida betg be en Svizra – ma en tut l'Europa
La situaziun sco en Svizra sa mussa er en ils 28 pajais da l'Uniun europeica UE. Er en quels creschan ils custs en emprima lingia pervi da la populaziun che vegn adina pli veglia. Fertant che la Svizra paja 26% dal product interiur brut per la segirezza sociala, è questa cifra èn l'UE cun 27% dal product interiur brut anc pli auta.
RR novitads 12:00
