Il medi chantunal il pli aut, Rudolf Hauri pretenda provas da controlla tar tut ils passagiers d'aviuns e bus che turnan da pajais da ristg da corona en Svizra. Plinavant vul el da la Confederaziun ina campagna che duai far attent viandants pertutgads.
Tgi che turna d'in tal pajais da ristg sto s'annunziar tar las autoritads chantunalas e sto duas emnas en quarantina. Tenor retschertgas da la «NZZ am Sonntag» sa tegnian dentant pli pauc che la mesadad londervi. L'Uffizi federal per sanadad BAG aveva annunzià venderdi da vulair controllar cun provas da controlla ils passagiers che ston en quarantina. Ad emna vegnian selecziunadas 20 fin 30 glistas da passagiers d'aviuns che turnan en Svizra.
Controllas duain metter signal
Sco Hauri declera a la NZZ, duain las provas da controlla avair in effect da signal. Ma la Confederaziun stoppia far questas controllas a moda pli sistematica e controllar singulas persunas da tut ils sgols da pajais da ristg.
Ils viandants ston sentir ch'i pudess tutgar mintgin.
Gist perquai dovria er ina campagna naziunala per far attent sin quai.
Confederaziun metta sin l'atgna responsabladad
Il BAG aveva annunzià venderdi ina tala campagna d'infurmaziun per persunas ch'entran la Svizra. Infurmaziuns vegnian da nov dadas als viandants che vegnan en Svizra via aviun u bus. Als cunfins duai dar placats d'infurmaziun.
En general quinta la Confederaziun dentant vinavant cun l'atgna responsabladad dals viandants. Quels sajan obligads da s'infurmar, ha accentuà Patrick Mathys, il manader da la secziun per superar crisas e collavuraziun internaziunala dal BAG.
Sistem smanatscha da vegnir surchargià
Hauri avertescha dentant er ch'il sistem pudess vegnir surchargià sche ulteriurs pajais da ristg vegnian sin la glista.
Pli bleras destinaziuns da vacanzas che sa tschentan sin la glista e pli svelt che noss sistem cun post d'annunzia e contact-tracing vegn al cunfin. Sche las infecziuns creschan tuttenina, na pudain nus betg pli far questa lavur e la situaziun vegn ord controlla.
Actualmain sa chattan 29 pajais sin la glista da ristg. In tozzel stadis novs duain anc suandar, ha declerà il Secretariat da stadi per migraziun.
