La Confederaziun ed ils chantuns dumbran puspè dapli fugitivs, surtut sur la ruta dal Balcan vegnan puspè dapli persunas en Svizra. Per l'onn current quintan Confederaziun e chantuns cun 19'000 dumondas d'asil fin la fin da l'onn. Quai fissan 27% dapli che l'onn 2021. Quest onn fan ils chantuns e la Confederaziun quint cun totalmain 80'000 fin 85'000 persunas fugidas che tschertgan protecziun en Svizra – ina gronda part da quellas da l'Ucraina.
Confederaziun reavra alloschis
Cun quai crescha er il basegn d'alloschis per ils fugitivs. Il dumber da plazs libers en ils chantuns saja sa reducì da 9'000 sin anc 7'000, annunzia la Conferenza dals directurs chantunals per fatgs socials. L'Uffizi federal per migraziun ha perquai reagì: Temporarmain vegni puspè prendì en funcziun alloschis ch'eran vegnids serrads. Quai pon esser hallas polivalentas ed implants da la protecziun civila.
Sco che la Confederaziun ed ils chantuns han ditg vers SRF bastian ils alloschis existents il mument - il dumber da fugitivs na saja betg uschè aut sco l'onn 2015. Dapli centers possian vegnir averts en il proxims mais sch'i dat basegn.
