Il Cussegl federal ha communitgà il venderdi, che durant ina conferenza naziunala d'asil il november 2025 hajan il Secretariat da stadi per migraziun (SEM), ils chantuns, citads e vischnancas survegnì l'incumbensa da preparar ina regulaziun clera per il futur dal status da protecziun S.
Questa lavur da reflexiun è ussa avant maun en in concept cun il titel «Avegnir Status S». Tenor il Cussegl federal serva el a la preparaziun sin trais scenaris pussaivels: da cuntinuar cun il status da protecziun S, d'abolir cumplettamain il status S en cas d'in armistizi stabil, e da sortir dal status da protecziun S en cas d'in conflict cuntinuant. La regenza dal pajais ha prendì per enconuschientscha da quest concept en sia sesida da venderdi. Il concept è per els ina survista che gida a la decisiun.
Dapli autonomia per chantuns tar agid social?
Supplementarmain prevesa il Cussegl federal da dar als chantuns dapli autonomia tar l'agid social per persunas cun status da protecziun S a partir dal mars 2027. Quai è ina reacziun sin il pachet da distgargia 2027 che sistescha las subvenziuns federalas per persunas ch'han dapi dapli che tschintg onns il status da protecziun S. Suenter la fin da la consultaziun tar quest concept vul il Cussegl federal prender ina decisiun anc questa stad. Sco il Cussegl federal scriva vinavant, saja la Svizra sa coordinada fin uss tar il status da protecziun S stretgamain cun l'UE e vegnia er vinavant a far quai.
Permissiuns da dimora s'avischinan
Sch'i va vinavant cun il status da protecziun S è impurtant perquai che la guerra en l'Ucraina ha cumenzà avant prest tschintg onns. En la lescha d'asil statti scrit che persunas cun basegn da protecziun survegnan dals chantuns ina permissiun da dimora sch'il Cussegl federal n'ha suenter tschintg onns anc betg abolì la protecziun temporara dal status S.