Tgi che vul fladar il spiert dals chantuns ina giada per propi, a quel vegn recumandà in gir tras la Svizra sin las vias d'auto. Nua che tge vehichels charreschan dat ina invista profunda - surtut en las bursas.
Sco il ranking d'autos da l'assicuranza Axa actual mussa, datti numnadamain differenzas frappantas tar la tscherna dals vehichels. Uschia dattan las abitantas ed ils abitants da Zug en media ora 67'000 francs per in auto – quasi 35 pertschient dapli che la media svizra.
En segunda posiziun stat il chantun Sviz cun in pau dapli che 60'000 francs, suandà d'Appenzell Dadens cun circa 57'000 francs. Ils autos ils pli favuraivels èn sin las vias en ils chantuns da la Svizra franzosa Neuchâtel, Giura e Friburg. Là importa la valur media dals vehichels tranter 44'000 ed in pau dapli che 45'000 francs.
Ch'il chantun Zug sa chatta a la testa na surprenda betg il redactur d'economia da SRF Manuel Rentsch. La munaida necessaria saja là savens avant maun per dar ora in zic dapli per in auto. «Latiers vegn dentant che la quota d'autos da firmas è relativamain auta a Zug. Quai fa era part da la retschertga.»
Il spectrum dals autos assicurads tanscha da models sut 10'000 francs fin a vehichels da luxus che valan plirs milliuns francs. Tenor l'Axa datti ina gronda paletta tar ils pretschs d'acquist – e quai en tut ils chantuns: «Il spectrum dals autos assicurads tanscha da models sut 10'000 francs fin a vehichels da luxus che valan plirs milliuns francs.» 'Media' vul numnadamain adina er dir che l'in va cun il Lada e l'auter cun il Lamborghini tras la cuntrada.
«Effect spezial» en il territori appenzellais
Ch'il chantun Appenzell Dadens sa chatta sisum en la classificaziun dals autos ils pli chars, è da dar ad in «effect spezial», sco che Rentsch al numna: «Là ed en il Vad laschan numnadamain ils gronds fittaders d'autos registrar lur autos.»
Quai pervia d'ina cunvegna dals uffizis chantunals dal traffic sin via cun la Confederaziun ed ils offerents. Blers dals autos da fittada èn relativamain chars e vegnan savens barattads: Quai ha er in effect sin la statistica da l'Axa.
Grond, grev e char
En ils chantuns bainstants e cun taglia bassa Zug e Sviz na charresch'ins betg mo gugent char, mabain era grev: Là pesan ils autos en media bunamain 1700 kgs (Zug) e 1600 kilograms (en il chantun Sviz, ed er en il Grischun). Tenor l'Axa èn ils autos là savens simplamain pli gronds. Il pais pli aut mussia dentant er che dapli autos electrics sajan en viadi, che sajan tendenzialmaing pli grevs pervia da lur battaria.
Ils autos ils pli vegls han numers da Berna, Schaffusa ed Appenzell Dadora. Els han en media tuts almain indesch onns. En il Tessin percunter circuleschan ils autos ils pli novs (8.9 onns).
L'impressiun subjectiva ch'ils autos en Svizra daventian pli chars e pli gronds tutga dal rest: Il ranking mussa ch'ils pretschs d'acquist per autos èn creschids ils ultims tschintg onns per circa 14 pertschient: Il 2019 era la media anc tar 44'000 francs, oz tar sur 50'000.