La maioritad da la glieud en Svizra viva cun entradas annualas da main che 75'000 francs, sco RSI ha rapportà. I dat dentant 6'427 pajataglias che gudognan passa 1 milliun francs per onn. Quai resulta da las cifras da l'administraziun federala da taglia per l'onn fiscal 2022. Igl èn las cifras las pli actualas ch'èn disponiblas.
Dals totalmain 5,4 milliuns pajataglias en la collecziun da datas (persunas singulas e famiglias) èn 0,12% superritgs. Sch'ins guarda sin la charta, en tge vischnancas svizras ch'ellas vivan, datti en egl ch'ellas èn concentradas sin paucs lieus e cleramain cunfinads. Stgars 200 vischnancas da totalmain passa 2'000 han persunas u famiglias superritgas tranter ellas.
Da ritgs e lais
La gronda part da las persunas cun fitg autas entradas viva en grondas citads. A Turitg èn quai 498, a Zug 432 ed a Genevra 275. Ma er vischnancas pitschnas sco Freienbach e Wollerau (chantun Sviz) u Küsnacht (chantun Turitg) han dapli superritgs che la citad da Basilea cun 172. A Lugano pajan 100 persunas spezialmain bainstantas taglia.
In cler muster dat en egl: Quasi tut ils lieus, nua ch'ils superritgs sa concentreschan, sa chattan a la riva d'in lai.
Hotspot numer in: Il territori tranter ils chantuns Lucerna, Sviz, Zug e Turitg ha spezialmain blers abitants ritgs. Il leader è Wollerau (SZ): Là gudognan dapli che 4 da 100 pajataglias passa in milliun francs ad onn. Suenter Wollerau – nua che Roger Federer abitava pli baud – suondan il vischin Feusisberg e bleras autras vischnancas en ina vischinanza da var 20 kilometers enturn Zug. Ils motivs? Ina bella situaziun, pussaivladads economicas, taglias bassas, discreziun, prestige ed in'auta qualitad da viver.
Hotspot numer dus: Genevra e conturn. Er enturn Genevra datti bleras vischnancas cun ina gronda part da superritgs. En spezial ston vegnir menziunads Cologny, Mies, Vandoeuvres, Collonge-Bellerive, Coppet, Anières, Founex, Corsier, Genthod, Commugny e Pregny-Chambésy.
Quai na datti betg tar nus
Las datas da l'administraziun federala da taglia mussan er ch'i dat pli paucas chasadas cun grondas entradas en la gronda part dals chantuns latins – en spezial en la Svizra taliana e rumantscha.
En las vals al sid da las Alps, ma er en il Giura, datti mo paucas vischnancas cun pajataglias che gudognan dapli che 200'000 francs per onn. En tscherts lieus è la meglra entrada netta ina da main che 75'000 francs. En la Bassa na datti quai praticamain nagliur.
Questas grondas differenzas regiunalas daventan anc pli cleras, sch'ins examinescha las vischnancas davart la quota da pajataglias che gudognan passa 100'000 francs per onn. Enturn Turitg, Zug, Genevra, Losanna e Basilea na datti strusch pli in lieu nua che la quota è sut 20%. En l'artg alpin ed en il sid èn talas vischnancas percunter l'excepziun.
Il rest da la Svizra na dat strusch en egl
Basilea e Lugano èn lunsch enavos. Bain datti er enturn Basilea intginas vischnancas bainstantas – la part dals superritgs sa chatta dentant là sut 1% da la populaziun.
