La damaun baud en la tschajera grossa: Ina illuminaziun externa programmada sveglia las fatschadas d'ina chasa da travs ed ina stgala da crap che maina dal pool al local da fitness chasan. En quella sa chattan il refurmatur da pilates, il bindel da currer, la sauna, il whirlpool e la bar da rinfrestgament. Entamez rudla Jan Gerber ora sia matta da yoga.
Ina rutina da la damaun ch'el ha dapi sia depressiun. «Covid è vegnì, mia firma era praticamain bancrutta, mia lètg è ida en ruina. Mia entira realitad è crudada ensemen», raquinta Jan Gerber da quest temp. «Gia la proposta da mia dunna da quella giada, da star a la fanestra e respirar profundamain, ha chaschunà a mai larmas.» Ina dimora staziunara per ina clinica ha gidà ad el da vegnir or da la spirala negativa.
Dolur è dolur. Tuttina quant bler ch'ins ha sin il conto da banca.
Istorgias sco quellas datti bleras. Ma cuntrari ad in pèr auters è Jan Gerber ritg, fitg ritg. «Jau hai fatg ina summa da milliuns da duas cifras cun investiziuns e firmas ch'jau hai bajegià si e vendì.»
Che la societad ha pauca cumpassiun sche ritgs daventan psichicamain malsauns ha el sez sentì. «Dentant la dolur è dolur. Tuttina quant bler ch'ins ha sin il conto da banca.»
100'000 francs per emna
Quest credo represchenta el er professiunalmain. El maina la clinica luxuriusa per sanadad mentala, Paracelsus Recovery al Lai da Turitg. «La gronda part da nossa clientella è internaziunala, blers vegnan dal Proxim Orient e da l'Orient Central», declera Gerber. «Igl èn descendents da famiglias bainstantas u interprendiders cun success. Ina pitschna part deriva da famiglias roialas, da la branscha da divertiment u da la politica.»
Ina terapia en ina clinica da luxus n'è betg ina pirla magica.
Lur suffrientschas èn las medemas sco quellas da «mortals normals»: problems da toxicomania, depressiuns, disturbis sfurzads. Lur pussaivladads da terapia dentant bainquant pli extravagantas. En la clinica da Gerber vegnan tgiradas ed isoladas maximalmain trais persunas il medem temp.
Durant la dimora viva la clientella en in'abitaziun da penthouse e vegn tgirada d'in team da var 15 persunas – da psichiaters ch'èn là da di e da notg, psicoterapeutas fin al manischunz ed al cuschinier privat. Saja quai la medischina da scola u la chavaltgada terapeutica da chavals: Qua è tut pussaivel che vegn giavischà. Ils 100'000 francs per emna ston vegnir pajà per quest intent.
Ch'el sez partia ina via da suffrientscha sumeglianta sco sia clientella saja nizzaivla, ma nagina strategia da marketing. «Jau sun plitost vegnì crititgà ch'jau na sun betg stà protegì da sez survegnir ina malsogna psichica, malgrà mia professiun.»
Tenda da beduin sin terrassa dal tetg
Dovri dentant in tal setting per vegnir sauns? Pervia da lur status na saja in segiurn en ina clinica publica savens nagina opziun, argumentescha Gerber. «Ultra da quai possia esser plitost surdumandond tge che gidaivel per la guariziun per persunas che n'han anc mai lavà sezzas lur laschiva, sch'ellas na pon betg mantegnair lur standard da viver durant la terapia.»
Ils blers sajan genuin – giavischs extravagants datti dentant mintgatant. Sche pussaivel, vegnian quels era ademplids. Ina tenda da beduins sin la terrassa dal tetg cun in fieu avert n'ha la polizia da la citad dentant betg lubì. Malgrà tut il luxus relativescha Gerber: «Be perquai ch'igl è char ed i dovra bleras resursas, n'è ina dimora tar nus nagina pirla magica.»