Cun sia vista sin il Lai da Neuchâtel posseda Mauborget (VD) tut il scharm d'ina vischnanca en las autezzas mesaunas sco ins vesa en il rapport da TSR. Malgrà ses avantatgs ha il vitg fadia da regiuvinar sia populaziun. Oz è ella la vischnanca francofona cun la pli gronda quota da seniors. Quasi mintga terz abitant ni abitanta ha passa 65 onns, il dubel da la media chantunala da 16%, cumpareglià cun la regiun Bernina ch'è «la pli veglia» en il Grischun cun 26% cumpart da persunas da 65 onns +, gnanc uschè bler.
Las decisiuns e l'avegnir da Mauborget vegnan marcads sfurzadamain da questa realitad. Ina populaziun pli veglia pretenda adattaziuns specificas urbanas e socialas. Tenor in studi da la Confederaziun «chaschuna ella custs supplementars per il stadi» e contribuescha a l'indebitament da las vischnancas.
Hotels vegnan tar chasas da tgira
Corbeirs, a l'ost dal Lai da Genevra, sa chatta en ina situaziun sumeglianta sco Mauborget. Là han ins gia stuì transfurmar l'hotel en ina chasa da tgira ch'è occupada cumplettamain. La scola è periclitada da vegnir serrada pervia da mancanza da scolaras e scolars. «Nus avessan gugent famiglias giuvnas cun uffants, quai è cler, ma i na dat betg pli blera plazza», declera Monique Tschumi, presidenta communala dal vitg.
Grischun e Tessin ils pli vegls
Entant ch'intginas vischnancas da l'exempel da la televisiun da la Svizra franzosa RTS ston sa confruntar cun la sfida da questa populaziun pli veglia, n'è la Svizra franzosa betg la regiun pertutgada il pli fitg da quest fenomen. Las datas tenor districts mussan che la Svizra Centrala ed Orientala ston sa preparar per ina gronda midada demografica.
L'entir Tessin, la gronda part dal Grischun ed ina part da la Svizra Centrala dumbran quasi in pensiunà sin quatter abitants. Ina relaziun che sa chatta lunsch sur quai che vegn constatà en la Bassa ed en citads sco Turitg, Losanna u Genevra.
