Perscrutadras e perscrutaders han installà nov traplas fotograficas en il parc naziunal che han registrà dapli che 43 uras da material da video sur pliras emnas, rapporta la EPFL. La squadra haja lura elavurà il material minuziusamain, utilisond instruments da l'IA per detectar e suandar mintga animal.
La EPFL descriva Mammalps sco l'emprima collecziun da datas multimodalas, ord pliras vistas ed annotadas en detagl davart il cumportament dals animals selvadis. Questa nova resursa pudess midar la situaziun areguard la surveglianza da la fauna e las stentas da protecziun, tenor l'instituziun. La finamira dal project è d'emprender d'enconuscher meglier la selvaschina en ses ambient per meglierar la protecziun.
Analisar var ventg cumportaments
Las datas rimnadas vegnan elavuradas per identifitgar ils animals, als dumbrar, ma surtut per analisar var ventg cumportaments sco mangiar, currer, sgnuflar, sa sgrattar, far bogn e sa copular.
Ils cumportaments ils pli simpels sco chaminar pon vegnir identifitgads cun mo in maletg. Auters dovran pliras sequenzas. «I dat cumportaments pli cumplexs che basegnan in context spazial u temporal pli grond, sco la chatscha u il far preda», precisescha Valentin Gabeff, doctorand al Laboratori da scienza per l'ambient e l'observaziun da la terra a la EPFL, il mardi en il 19h30 da RTS.
Questa tecnica è er interessanta, perquai ch'i sa tracta d'in access «betg invasiv e che respecta l'animal», suttastritga er Devis Tuia, responsabel dal laboratori. «Ins na sto betg tegnair l'animal, al narcotisar per metter in cularin u in sensur».
La rimnada da maletgs ha cumenzà la stad 2023 e cuntinuescha.
