Dapi quest onn dastgan las chatschadras ed ils chatschaders duvrar surdinas en il chantun Grischun grazia a la nova ordinaziun federala da chatscha. Questa novaziun na persvada dentant betg las protecturas ed ils protecturs dals animals ch'èn da l'avis che quest instrument fetschia donn a la segirezza dals animals e da las viandantas. Las autoritads percunter defendan l'ordinaziun.
«Igl è bel che tut è ì uschè spert», ha declerà il chatschader Guido Andry al telegiornale dad RSI ed ha declerà ch'i dovria «normalmain dapli temp ed i stoppia normalmain passar tras dapliras instanzas per l'approvaziun». Il chatschader ha remartgà ch'ins «na saveva betg sch'i dovria ina midada da lescha u da l'ordinaziun per cuntanscher quai», ma «ussa è la situaziun sa midada, e quai è positiv».
Las dumondas per duvrar ina surdina muntan a var 600 da totalmain 5'500 chatschadras e chatschaders en il Grischun. Adrian Arquint, co-manader da l'Uffizi da chatscha e pestga dal chantun Grischun ha rapportà che «nus vesain in avantatg surtut per las chatschadras, per ils chatschaders e per lur chauns», numnadamain «per la sanadad da l'udida», ultra da quai han ins constatà avantatgs «per l'exactadad dal tir». Ina surdina custa 1'000 francs e po vegnir duvrada per la chatscha auta, per la chatscha da capricorns e per la chatscha speziala.
L'innovaziun na persvada betg tuts, en spezial betg quels che s'engaschan per ils dretgs da la selvaschina. Roberto A. Babst, president da l'Uniun per la protecziun d'animals selvadis, ha remartgà «ch'ins n'auda betg pli il tun pervia da la surdina e che l'animal na po betg fugir», mabain «resta là, uschia ch'ins po sajettar dapli ch'in exemplar». Ultra da quai «na pon ils viandants betg valitar la direcziun da tir e na san betg, nua ch'ils chatschaders sa chattan», ha Babst punctuà. Ed era «na pon ils guardiaselvaschina betg giuditgar danunder ch'il sajet è vegnì» e «sch'i sa tracta per exempel d'in culp scumandà u d'in culp regular», concluda Roberto A. Babst.