Il destin da la Grönlanda stat pir che mai en il center da las discussiuns. Tenor sia pledadra pondereschia Donald Trump schizunt in engaschi dal militar per cuntanscher la controlla da quest'insla strategicamain impurtanta.
Tenor il minister da l'exteriur american Marco Rubio preferiss'ins però in'autra opziun: Betg a conquistar la Grönlanda, mabain cumprar ella. Po in pajais propi cumprar in auter, e sche gea, quant custass quai als Stadis Unids?
Ord vista dal dretg internaziunal èsi pussaivel da cumprar ina part d'in stadi. Cumprar territoris è dal reminent stà vaira usità en il 19avel tschientaner: Ils Stadis Unids han cumprà la Louisiana da la Frantscha, la Florida da la Spagna e l'Alasca da la Russia. I dat schizunt in cas da precedenza tranter il Danemarc ed ils Stadis Unids: 1917 era la curuna danaisa en possess da las Inslas Virginas en la Caribica. Il Danemarc aveva approvà da vender quellas per 25 milliuns dollars. Oz è questa pratica pli rara ed è suttamessa a cundiziuns severas. Sch'i va per la suveranitad, lura dovra quai l'approvaziun dal stadi e da la populaziun pertutgada.
Var 50 milliardas
Suenter ina stimaziun d'in expert per possess da terren che la gasetta franzosa «Le Figaro» ha dumandà il 2019 pudess la cumpra da la Grönlanda custar bun 50 milliardas dollars. Sco tar immobiglias sto er qua vegnir resguardada la surfatscha: La Grönlanda cumpiglia passa 2 milliuns kilometers quadrat.
Il pretsch dependa er da las resursas natiralas e da la situaziun geografica, in factur che ha intimà Washington gia il 1946 da far in'offerta da cumpra. Lezza giada aveva il president Harry Truman offrì 100 milliuns dollars. Sia offerta ch'è restada secreta ha la regenza dal Danemarc refusà.
Ils Stadis Unids fissan oz per almain trais motivs puspè pronts da prender enta pugn la bursa:
- L'emprim motiv stat en connex cun la situaziun strategica da la Grönlanda en l'Arctica – uschia Donald Trump. I va per franar la Russia e la China.
- Il segund motiv stat en connex cun las resursas d'energia – petroli, gas natiral e terras raras – da las qualas la Grönlanda dispona apparentamain en abundanza.
- Il terz motiv è medemamain da natira economica: Cun la stgaudada globala pudess l'Arctica daventar interessanta per la navigaziun commerziala.
In contract davart il diever exclusiv da l'armada americana?
Sch'il Danemarc na vul savair nagut d'ina vendita, datti anc in'autra opziun che la cumpra pura: In contract d'associaziun libra, sco ch'el exista tranter Washington e pliras gruppas d'inslas en il Pacific, per exempel las Inslas da Marshall. Quellas restan formalmain independentas, concedan dentant a l'armada americana il dretg d'utilisaziun exclusiv da lur territori per in access al commerzi privilegià.
Questa perspectiva intimescha la regenza da Trump dal rest da sustegnair il moviment d'independenza da la Grönlanda e da svegliar uschia tensiuns tranter las autoritads localas ed il Danemarc, sperond da cuntanscher in referendum davart l'autodeterminaziun. Tenor l'opiniun americana fissan las autoritads da la Grönlanda pli avertas per tractativas davart in tal deal, sch'ellas sa distatgassan dal champ d'influenza danaisa.
