Siglir tar il cuntegn

Header

cuntegn

Dicki Lamdark La dunna che s'engascha per Tibetanas e Tibetans

Dicki Lamdark è naschida e creschida si a Samedan en l'Engiadin'Ota. Sias ragischs ha ella dentant en il Tibet. Oz è ella advocata a Zug e s'engascha, tranter auter, per la populaziun tibetana.

Dicki Lamdark ha passentà ils emprims 20 onns da sia vita a Samedan en l'Engiadin'Ota. Dapi radund 30 onns abita ella uss en la Bassa e lavura sco advocata. Dicki Lamdark è sa spezialisada sin il dretg da famiglia. Adina puspè surpiglia ella era cas da clients tibetans cun problems giuridics.

audio
Dicki Lamdark s'engascha a moda giuridica per Tibetanas e Tibetans
ord Actualitad dals 16.03.2021.
laschar ir. Durada: 3 minutas 44 Secundas.

In cas che stat a cor

Sche l'Engiadinaisa raquinta da ses clients, vul ella oravant tut discurrer dad in cas. I va per in giuven ch'è fugì dal Tibet en l'India, nua ch'el viva plirs onns en ina claustra. Il 2010 sgola el en Svizra cun in visum da turists. Qua fa el la dumonda d'asil. Quai dentant senza success. El sto bandunar la Svizra.

Jau enconusch gia uschè ditg quest um e perquai èsi in cas che stat a mai fitg a cor.
Autur: Dicki Lamdark advocata

Oz viva l'um tibetan puspè en l'India. Sia dunna e ses uffant èn dentant en Svizra. L'advocata Dicki Lamdark cumbatta gia dapi 8 fin 10 onns per unir questa famiglia.

Tibet

Avrir la box Serrar la box
Legenda: Keystone

Il Tibet è in territori da muntogna en la China. In otgavel da la terra chinaisa è il Tibet. Uschia è il Tibet bunamain quatter giadas pli grond che la Germania. Sin l'entir territori vivan dentant mo radund 3,5 milliuns persunas. Las persunas che abitan en il Tibet tutgan bain tar la China, vegnan dentant supprimids dal stadi.

RTR actualitad 08:00

Artitgels legids il pli savens