La cumissiun da concurrenza WEKO ha ordinà ina multa da 18 milliuns francs cunter la Swisscom. Quai en connex cun la dispita davart la rait da fibra da vaider. Quella na saja betg faira ed excludia la concurrenza dal martgà. Per la Swisscom na saja questa argumentaziun da la WEKO betg plausibla. Perquai fa il concern recurs cunter la decisiun e tira vinavant il cas davant il Tribunal administrativ federal.
Tenor la Swisscom retardeschia la decisiun da la WEKO l'engrondiment da la rait cunzunt en regiuns ruralas. En pli s'augmentian ils custs. Il concern da telecommunicaziun ponderescha da far recurs cunter la decisiun da la WEKO e da trair il cas davant il Tribunal administrativ federal.
Swisscom haja empruvà da crear in monopol
Il december 2020 aveva la WEKO franà il project da la Swisscom d'engrondir la rait da fibra. Swisscom aveva cummenzà a construir lingias cumbinadas che mainan da la centrala fin pliras chasadas. La WEKO insita dentant ch'i sto dar vinavant lingias d'access per mintga chasada. Uschiglio na possian ils concurrents da la Swisscom betg porscher atgnas offertas d'internet.
La renfatscha da la WEKO: Sch'els n'avessan betg intervenì avess Swisscom midà la structura dal martgà ed creà in «monopol factic» per sasez. Pervi da quai han els decis che la Swisscom sto pajar il chasti da 18 milliuns francs.
