Giuvenils da 16 e 17 onns na vegnan per entant betg a pudair vuschar sin plaun naziunal. Suenter ina dispita da plirs onns ha il Cussegl naziunal ditg definitiv Na ad ina moziun, che vuleva introducir il dretg da vuschar ed eleger activ davent da 16 onns.
Cun 106 cunter 84 vuschs ha il Cussegl naziunal decidì, da stritgar in’iniziativa parlamentara da Sibel Arslan (Verds, Basilea-Citad), davart la vegliadetgna da votar. L’iniziativa è cunquai liquidada.
Anc la stad passada era il Cussegl naziunala s’exprimì per laschar elavurar in project – lura cun 98 cunter 93 vuschs. E gia ils onns 2020 e 2021 aveva el fatg quai.
Vent criv ord la cumissiun
La cumissiun d’instituziuns politicas dal Cussegl naziunal ha dentant era proponì gia la terza giada al Cussegl naziunal, da betg suandar a l’iniziativa dad Arslan. Quella preveseva il dretg d’eleger activ per persunas da 16 e 17 onns. Betg cumprais era il dretg d’eleger passiv, pia da pudair star a disposiziun per in’elecziun.
Per stritgar l’iniziativa Arslan èn s’exprimids las fracziuns da la PPS e da la PLD, sco era ina part da la fracziun dal center. S’engaschadas per la vegliadetgna da votar da 16 eran la PS, la PVL, ed ils Verds.
