Il medem mument ha l'Uffizi federal da sanadad registrà en cumparegliaziun cun ier – 19 novas entradas en ospitals e dus novs mortoris.
Il BAG aveva gia l'entschatta da quest'emna survegnì levamain dapli annunzias da cas confermads da corona, che anc avant in'emna. Il mardi avevi dà 197 cas annunziads, il glindesdi 128. Avant in'emna eran quai stads il glindesdi 105 cas, ed il mardi 187 cas. La media dals cas confermads l'emna passada è stada da glindesdi fin dumengia tar radund 220 cas per di.
Blers vulan returnar da las Balearas
Plirs tschients turists svizzers sin las Balearas han reservà anticipadamain lur sgol enavos en Svizra. Uschia vulan els evitar da stuair ir en quarantina. Davent da damaun gievgia èn las inslas da vacanzas spagnolas sin la glista federala dals pajais cun ristg augmentà da corona.
Swiss è pronta da sgular dapli
La societad aviatica Swiss sgola enavos oz mesemna passa 300 turists da Palma de Mallorca, e dovra perquai in aviun pli grond. E sco la societad ha ditg sin dumonda da l’agentura da novitads Keystone-SDA, vegnian els ad observar exact il svilup ils proxims dis.
Ils organisaturs da viadis Hotelplan, Tui e Kuoni han tenor atgnas indicaziuns actualmain plirs tschients giasts sin las Balearas.