Ella crititgescha ils suandants puncts:
- En la digitalisaziun sajan ins per part in «pajais da svilup». Quai sa mussia tar las datas da sanadad, u dal sectur d'energia. I na dettia betg datas en temp real qua. Quai muntia che mesiras sajan in «sgol tschorv».
- Ch'ins stoppia bandunar l'energia fossila sappian ins gia daditg. Quai muntia ch'ins stoppia electrifitgar tut. Ch'i manchia uss l'energia, na saja nagina surpraisa. E tuttina haja la populaziun decis 2017 in scumond per novas ovras atomaras, ed ina cunvegna cun l'Uniun europeica davart il provediment d'energia saja lunsch davent.
- Che la populaziun vegnia pli veglia saja il medem en tuts pajais industrialisads. Che quai influenzeschia ils fatgs socials, il martgà da lavur e la creschientscha d'economia veglian gruppas sanestras dentant betg udir. I na dettia ina discussiun constructiva sur l'auzament da la vegliadetgna da pensiun.
- I saja in fact ch'i dovria persunal qualifitgà. La libra circulaziun da persunas tranter la Svizra e l'UE chaschuna dentant malesser en Svizra. Perquai stoppian ins duvrar meglier il potenzial da lavurers e lavureras entaifer il pajais.
Quels problems na possian ils departaments federals betg schliar persuls. I saja perquai necessari ch'il Cussegl federal ageschia sco squadra, e quai a moda offensiva e constructiva. Economiesuisse pretenda perquai dal Cussegl federal da far fin cun la baruffa da cumpetenzas ed il tactar en l'interess da l'atgna partida. Quai na schlia nagins problems.
Legenda:
Monika Ruehl, la parsura da la direcziun d'Economiesuisse declara ils puncts da critica durant la conferenza da medias.
Keystone
audio
Per tadlar: curt e cumpact
ord RTR Audio dals 02.02.2023.
laschar ir. Durada: 1 minuta 7 Secundas.
