La Cumissiun federala per l'electricitad Elcom è il mument da buna speranza che la Svizra vegn ad avair avunda electricitad per ils mais d'enviern. Decisiv persuenter ch'ins haja pudì evitar ina situaziun da mancanza sajan las temperaturas miaivlas. Plinavant èn, tras la blera plievgia ch'igl ha dà, ils lais da fermada en Svizra per il mument emplenids bain cun 78%. Normalmain èn ils livels dals lais da quest temp sin 55% fin 60%.
Avunda electricitad perquai ch'igl ha avunda gas
La Svizra na producescha betg avunda electricitad per l'enviern ed è uschia dependenta d'imports da l'Europa. Pervi da las temperaturas miaivlas è vegnì duvrà damain gas en l'entira Europa ed ils arcuns da gas èn il mument emplenids meglier ch'ils ultims onns. Quai è impurtant perquai che blers pajais da l'Europa produceschan electricitad cun gas ch'els pon lura exportar per exempel en Svizra. Plinavant saja puspè disponibla dapli electricitad atomara da la Frantscha.
