Siglir tar il cuntegn

Header

audio
La bilantscha da Balthasar Glättli
Or da Samstagsrundschau dals 16.10.2021.
abspielen. Laufzeit 28 minutas 37 Sekunden.
cuntegn

Elecziuns 2023 Glättli lantscha cumbat per il Cussegl federal

Il schef da partida dals Verds Balthasar Glättli conferma las ambiziuns da sia partida per il Cussegl federal.

Igl è in cler statement che Glättli ha fatg envers la «Samstagsrundschau» da Radio SRF. Sche la partida possia confermar il 2023 il resultat dal 2019 stoppian els chattar sco ina da las fermas partidas il plaz en la regenza. Ina finamira concreta per las elecziuns naziunalas l'atun 2023 n'ha Glättli però betg numnà. La partida veglia cuntanscher tantas electuras e tants electurs sco pussaivel. Tar las elecziuns avant dus onns avevan ils Verds pudì augmentar lur cumpart d'electurs da 6,1% sin 13,2%.

Tenor il pli nov barometer da la SRG po la partida era tegnair quels var 13%. Entant che la PLD ed il Center perdan vuschs. En il mument vegnan tuttas trais partidas sin 13-14% da las vuschs – la gronda differenza exista però tar ils cussegliers federals. La PLD tegn cun Karin Keller-Sutter ed Ignazio Cassis dus posts en la regenza, il Center cun Viola Amherd in post ed ils Verds nagin.

Betg sin ils custs da la PS

In'attatga sin in dals dus sez da la Partida Socialdemocratica n'ha Glättli betg vulì sclauder, dentant: «i dat partidas ch'èn pli surrepreschentadas», uschia Glättli.

Nus na lain betg gudagnar sin cust da la PS, mabain daventar ensemen pli ferms
Autur: Balthasar Glättli President Verds

Las ambiziuns dals Verds sin in sez en il Cussegl federal n'èn betg novas. Gia suenter las elecziuns il 2019 avevan ils Verds attatgà il segund sez da la PLD. Quai cun ina candidatura da la Cussegliera naziunala bernaisa Regula Rytz. Rytz n'ha però gì nagina schanza.

Er la PVL ha ambiziuns

Ils verd-liberals han tuttina a lur collegas da colur confermà lur ambiziuns per in post en il Cussegl federal. A la radunanza da delegads da la sonda ha il president da la PVL Jürg Grossen annunzià ch'il pass en il Cussegl federal stoppia esser la finamira da la partida.

RTR novitads 15:00

Artitgels legids il pli savens

Scrollar a sanestra Scrollar a dretga