Siglir tar il cuntegn

Header

Navigaziun

cuntegn

Duo 1 sin via: Candinas & Pult «Avair ureglias avertas e tadlar»

Era sch'els èn veglias vulps en la politica: In zic in'aventura èsi tuttina per Martin Candinas (PCD) e Jon Pult (PS) dad ir sin visita tar insatgi senza savair propi tge che spetga.

Omadus candidats per il Cussegl naziunal accentueschan dentant ch'inscunters cun la populaziun sajan eminent impurtants per politichers. E discurs spontans dettia adina puspè, per exempel en il tren. Perquai sa legran els sin l'inscunter da RTR en il rom da «Ti ed jau faschain politica»

Ordavant san Martin Candinas e Jon Pult be ch'il viadi maina en l'Engiadina Bassa tar l'ustier Ruodi Duschletta che vuless discutar davart las ovras socialas, meglier ditg l'AVS e la cassa da pensiun.

5 dumondas a Martin Candinas

Personen-Box aufklappenPersonen-Box zuklappen

Pudessas Vus s'imaginar da lavurar pli ditg che la vegliadetgna da pensiun?

En mintga cas, dentant segir betg en temp cumplain. Perquai sun jau fermamain da l'avis che nus stuain motivar la populaziun sur las assicuranzas socialas da lavurar ord libra voluntad sur la pensiun ora. Quai n'è betg per tuts pussaivel ord motivs da sanadad. Ed era betg tutta lavur è tuttina dumandada. Qua sto l’economia far sforzs e porscher plazzas da lavur parzialas per pensiunads. Quella discussiun è bler pli impurtanta che da simplamain vulair auzar la vegliadetgna da pensiun per tuts.

Per tge n’avais Vus uss betg temp che Vus vegnis segir a far cun esser pensiunà?

Sco buob e giuvenil hai jau rimnà marcas postalas. Insaco sent jau che l'interess per quels pitschens maletgs che cuntegnan tuts in'istorgia è anc adina in zic avant maun. Suenter la pensiun pudess jau m'imaginar da reactivar quest hobi. Segir vuless jau lura ir dapli a viagiar en la natira – en la muntogna grischuna ed er en l'exteriur.

Faschais Vus quitads che Vus finanziais ils pensiunaris dad oz e sez survegnis betg tant da la petta?

Jau na fatsch betg exnum quitads per mai, mabain per mia generaziun. Igl è in fatg ch’il fondo da l’AVS vegn ad esser vit l'onn 2030 e che nus faschain lura onn per onn passa 5 milliardas deficit, sche nus n'agin betg. Passa 20 onns n'è il parlament betg stà abel da far ina revisiun da l’AVS. Uschia na po quai betg ir vinavant.

Cun tge sentiments guardais Vus – quai che pertutga las finanzas – en direcziun pensiun?

Persunalmain hai jau ina terza pitga. Blers giuvenils e giuvens creschids pudessan prestar senz’auter da far quest’assicuranza – na fan dentant betg. Quai fa in zic quitads. Da l’autra vart datti era persunas che na pon betg sa prestar ina tala assicuranza. Perquai èsi impurtant da salvar l’AVS e la cassa da pensiun a lunga vista.

Avessas il curaschi da svidar Vossa cassa da pensiun? Sche gea per tge?

Actualmain na ves jau nagin basegn persuenter. Jau hai dentant chapientscha per persunas che fan quai, sch’ellas èn persvadidas d'insatge e la situaziun pretenda quai pass per realisar in siemi. Savens è quai en connex cun fundar ni surpigliar ina fatschenta u per cumprar u construir ina chasa. Impurtant fiss da sa cumprar en pli tard en la cassa da pensiun u da far ina terza pitga. Deplorablamain n'è era quai betg tar tuts pussaivel ubain che quai vegn manchentà. La finala sto mintgin purtar sez las consequenzas e quellas san enconuschentamain esser diras.

5 dumondas a Jon Pult

Personen-Box aufklappenPersonen-Box zuklappen

Pudessas Vus s'imaginar da lavurar pli ditg che la vegliadetgna da pensiun?
Sch'jau sun anc fit poss jau m'imaginar da far lavurs per il diever public ubain in engaschament social – dentant gratuit.

Per tge n’avais Vus uss betg temps che Vus vegnis segir a far cun esser pensiunà?
Far viadis cun il tren en tut ils pajais da l’Europa.

Faschais Vus quitads che Vus finanziais ils pensiunaris dad oz e sez survegnis betg tant da la petta?
L’AVS è in sistem segir e social. Quel vegn a funcziunar era cura ch'jau sun pensiunà in di. Pli critica è la situaziun da la segunda pitga – la cassa da pensiun. Jau persunalmain fatsch dentant politica per chattar soluziuns. E perquai sun jau in optimist.

Cun tge sentiments guardais Vus – quai che pertutga las finanzas – en direcziun pensiun?
Atgnamain cun paucs sentiments – dentant cun bler pragmatissem. Igl è impurtant da defender l’AVS per l’avegnir. E quai per tuts e betg be per paucs.

Avessas il curaschi da svidar Vossa cassa da pensiun? Sche gea per tge?
Per mai vegniss quai maximalmain en dumonda per finanziar l’atgna chasa. Jau na svidass dentant betg la cassa da pensiun per activitads economicas.

L'inscunter da Ruodi Duschletta cun Martin Candinas e Jon Pult vegn publitgà ils 4 da settember da mezdi sin www.rtr.ch ed è era tema al Radio Rumantsch ed en il Telesguard.

Il project da RTR «Ti ed jau faschain politica»

Il project da RTR «Ti ed jau faschain politica»

Persunas sco ti ed jau envidan candidatas e candidats per il Cussegl naziunal ad ina baterlada. Enturn maisa raquintan els dad ina sfida che fatschenta els en lur mintgadi. Quels 5 inscunters emetta RTR durant 5 mesemnas:

  • 04-09 Ovras socialas tar Ruodi Duschletta, Sent
  • 11-09 Sanadad tar Sandra ed Andri Baltermia, Salouf
  • 18-09 Economia tar Flurina e Simon Kaufmann-Henkel, Cuira
  • 25-09 Clima tar ina classa da la scola media, Glion
  • 02-10 Diaspora tar Peter Vesti e Petra Camathias, Turitg

Tar mintga tema dain era in sguard en l'istorgia, preschentain cifras e fatgs e numnain las sfidas actualas.

Las elecziuns naziunalas èn ils 20 d'october 2019.

RR actualitad 07:00