La presidenta dals Verds, Regula Rytz, vul far il pass en il Cussegl federal. La cussegliera naziunala dals Verds ha ditg gievgia a Berna ch'ella saja pronta. Anc betg cler èsi dentant, schebain ils Verds vulan insumma candidar ils 11 da december. Quai vul la fracziun da la Chasa federala decider damaun, venderdi.
Suenter il success da las elecziuns parlamentaras dals 20 d'october datti duas gruppaziuns. L'ina è da l'avis ch'ils Verds hajan – sco quart-ferma partida – in dretg sin in sez en il Cussegl federal. Per cuntanscher questa finamira fissan els pronts da betg reeleger in cusseglier federal en uffizi. Sco candidat per ina nunreelecziun vegn savens numnà il cusseglier federal Ignazio Cassis.
L'autra gruppaziun dentant chatta ch'i saja uss anc memia baud per in cusseglier federal verd. La partida stoppia l'emprim confermar ses success da las elecziuns.
PPS vul attatgar il sez da Sommaruga
Entant che las bleras partidas da regenza na din anc nagut davart la candidatura da Regula Rytz, ha il schef da fracziun da la PPS, Thomas Aeschi ditg ch'el proponia a sia fracziun d'envidar Regula Rytz proxim mardi ad ina audiziun.
Aeschi vul attatgar il sez da Simonetta Sommaruga. Cun la PLD e la PS sajan duas partidas surrepreschentadas en il Cussegl federal. Cun eleger Rytz enstagl dad Ignazio Cassis sesessan dus represchentants da Berna en la regenza federala. Il chantun Berna saja gia uss savens surrepreschentà en Chasa federala.
RR novitads 15:00
