Damaun cumenza en Svizra l’emna da vaccinaziun naziunala. Per quella ha la Confederaziun mess a disposiziun 96 milliuns francs. Sco il «Sonntagsblick» rapporta, hajan ils chantuns fin uss pir dumandà 18 milliuns francs. Quai è gnanc in tschintgavel da la summa reservada. Cunzunt chantuns cun ina quota da vaccinar bassa – sco l’Appenzell Dadora – hajan strusch dumandà daners en relaziun cun il dumber d'abitants.
Er tenor la «Sonntagszeitung» è il success da l’emna da vaccinaziun naziunala periclitada, perquai che chantuns cun ina quota bassa – sco Sviz ed Appenzell Dadens – na vegnian betg propi activs.
Trais milliuns per il Grischun
Il chantun Grischun vul tenor atgnas indicaziuns motivar fin a 5% da la populaziun da sa laschar vaccinar. El survegn per la campagna radund trais milliuns francs da la Confederaziun.
