I saja in «pugn en fatscha» per mintga pur pertutgà
L'Uniun svizra per la protecziun dals spazis da viver rurals cunter animals da rapina gronds sa defenda cunter las cifras publitgadas da la «Gruppa luf Svizra». I saja sco in pugn en fatscha per purs e puras pertutgadas.
Tenor l'uniun saja da menziunar che dapli muntaneras da vatgas-mamma, da chavals u d'asens daventan unfrendas dals lufs. Che las cifras da stgarp da l’emprima mesadad dal 2023 sajan pli bassas, declera l’uniun cun il fatg che divers manaschis sajan sa retratgs u hajan reducì lur muntaneras pervia dal luf. Uschia passentian era mintg’onn damain animals da niz sin las alps. Er na vegnian ils numerus animals blessads e sparids betg quintads en la statistica ed ils stgarps na capitian betg be durant la stad d'alp.
Vinavant constatescha l’uniun ch’il credit federal da 4 milliuns francs per la protecziun da muntaneras per la stad d'alp 2023 saja gia duvrà si il zercladur. Ils custs totals per l'entira politica d'animals da rapina gronds n'hajan nagins cunfins.
«Gruppa luf Svizra»: Lufs han stgarpà 80% pli pauc animals da niz ch'il 2022
Curt avant che la nova ordinaziun da chatscha entra en vigur è il dumber da stgarps pli bass. En il Grischun è il dumber da stgarps sa reducì per 80% cumpareglià cun l'emprim mez onn 2022. En tut hai l'emprima mesadad da l'onn dà 27 stgarps d'animals da niz en il Grischun. Ed er en il Vallais hai dà ina diminuziun da cas per 55%. Là hai dà 58 stgarps ils emprims sis mais da quest onn.
Uschia hai er dà damain permissiuns da sajettar: L’onn passà hai dà sulettamain l'emprim mez onn sis lubientschas per sajettar lufs – quest onn anc naginas. Tenor la «Gruppa luf Svizra» mussan quellas cifras ch'ils chauns da protecziun fetschian effect. Malgrà dapli lufs na dettia betg automaticamain dapli donns.
Plinavant sajan ils animals da niz pervia da la primavaira miaivla quest onn ids pli baud sin ils prads. Uschia ch'ins na possia er betg dir ch'ils animals sajan stads pli ditg en las stallas ed igl haja pervia da quai dà damain stgarps. Plitost saja la protecziun da las muntaneras vegnida meglra, sco l'organisaziun scriva vinavant.
Dumber da lufs vegn probabel a crescher
En Svizra vivevan l'enviern passà 26 trieps e bun dus tozzels pèrins. Quest dumber vegnia probabel a crescher vinavant, uschia la gruppa. Perquai ch'era blers da quests trieps e pèrs vegnian probabel a trair si quest onn animals giuvens e perquai ch'i vegnia er adina daplirs dals pajais vischins.
