Cun 9'207 cas novs da corona è il dumber be cnap sut il record da gievgia. Il pli fitg croda si il dumber da mortoris entaifer in di. Quel è s'augmentà da 31 sin 52. Uschia crescha il dumber total da mortoris en Svizra sin 2'037.
Er tar las ospitalisaziuns è il dumber vinavant aut. Gievgia hai dà 287 novas ospitalisaziuns, oz hai dà 279.
103 novs cas en Grischun
En Grischun hai dà 103 novs cas da corona. Isoladas èn il mument 615 persunas en Grischun, en quarantina sa chattan il mument 1'329 persunas. En l'ospital èn il mument 38 persunas en Grischun, 32 en tgira e sis èn en tgira intensiva e vegnan respiradas.
Rata da positivitad tar 22,5%
Entaifer 24 uras han ins fatg 38'211 tests. Total han ins pia fatg en Svizra 1,93 milliuns tests. Da quai èn 7,9% stads positiv. Las ultimas emnas è la rata da positivitad s'augmentada sin 22,5%.
Il mument sa chattan 31'419 persunas en isolaziun e 26'333 contacts èn en quarantina. 7'438 persunas èn en quarantina perquai ch'ellas èn turnadas da pajais da ristg.