Sch'ils envierns èn marcads d'ina mala cuverta da naiv munta quai per regla ch'i dat blers accidents. L'enviern 2025/2026 è stà in da quels cun surproporziunalmain bleras lavinas ch'èn idas a val ed han tschiffà sportistas e sportists. En totalmain 171 accidents sajan 244 persunas vegnidas en lavinas en Svizra. 15 persunas èn mortas.
Cumpareglià cun ils ultims 10 onns sajan capitads in toc dapli accidents da lavinas. En media dals ultims 10 onns discurra il SLF da 127 accidents cun 182 persunas tschiffadas. Il dumber da 15 morts è quest onn però en la media (media dals ultims 10 onns: 14 morts).
Problem da la naiv veglia
La gronda part da las lavinas è sa distatgada en la cuverta da naiv veglia. Savens sajan quai er stadas lavinas grondas, scriva il SLF vinavant. Pertutgadas il pli ferm dal problem da naiv veglia eran cunzunt regiuns en il Vallais, il Tessin ed il Grischun. Durant sis emnas ha valì en il Grischun tranter schaner e mars in privel da lavinas considerabel (stgalim 3).
Favrer cun blera naiv e situaziun critica
Cunzunt il favrer è stà in mais critic quai che pertutga la situaziun da lavinas. Pliras giadas hai navì fermamain ed igl ha dà blera naiv nova. Temporarmain è il privel da lavinas schizunt stà sin il stgalim il pli aut, stgalim 5 (fitg grond). L'ultima giada aveva l'Institut da naiv e lavinas proclamà in grond privel da lavinas il schaner 2021.
Durant il mars è la situaziun da lavinas lura sa calmada e la naiv sa colliada cun las vettas veglias. Suenter che l'enviern è anc ina giada turnà il mars hai dà in nov problem da lavinas, numnadamain èn lavinas sa distatgadas da las vettas a la surfatscha. Quai è er stà il cas en il Grischun. Durant il mars ha il SLF però registrà nagins morts en lavinas.