La Partida populara svizra beneventia quella decisiun, sco quai ch’ella ha rispundiu sin la dumonda da l’agentura da novitads Keystone-SDA. La PS percunter vesa il return dad Ermotti critic. El saja da ses temp tar l’UBS s’engaschà per subvenziuns da taglia e cunter dapli regulaziuns, crititgescha la cussegliera naziunala Jacqueline Badran sin Twitter. Per il cusseglier naziunal dals Verds, Gerhard Andrey dovri ussa surtut ina cultura da responsabladad. La cussegliera naziunala da l’Allianza dal Center, Elisabeth Schneider-Schneiter, scriva sin Twitter d’ina buna decisiun. La PLD spetga dal niev CEO da l’UBS ch’el fetschia tut il pussaivel per minimar las relaschadas en connex cun la cumpra da la CS.
Sergio Ermotti daventa puspè CEO da l'UBS
L'anteriur manader da l'UBS, Sergio Ermotti, turna enavos tar la banca gronda. El remplazza il CEO Ralph Hamers. Quai scriva l'UBS. Ermotti saja qualifitgà per la gronda incumbensa: d'integrar la Credit Suisse, che l'UBS ha surpiglià suenter sia crisa a la bursa. Ermotti sez ha ditg ch'el sappia ch'el saja responsabel envers la clientella e la regenza svizra.
Ralph Hamers sa retira voluntariamain e di ch'i saja en l'«interess da la nova cumbinaziun, dal sectur da bancas e da la Svizra».
In enconuschent
Ermotti aveva gia timunà l'UBS per 9 onns fin il 2020. Là haja el fatg bunas midadas per la banca suenter la crisa da finanzas globala il 2007. Per exempel haja el midà la cultura en la banca, e fatg pli pitschens la sparta d'investment banking.
La bursa reagescha a moda positiva sin l'annunzia da l'UBS che Sergio Ermotti turna puspé enavos sco CEO tar la banca gronda. Il curs da l'aczia da la banca gronda è creschì per passa 4% curt suenter che la bursa ha avert.
Ermotti vegn a surpigliar sia funcziun a la proxima radunanza generala da l'UBS ils 5 d'avrigl.
