Festa federala a Basilea - 12'000 jodladras e bittabandieras fan frunt a las chaliras

Var 200’000 visitadras e visitaders hajan fatg festa ensemen cun ils radund 12’000 activs, hai num en la communicaziun a las medias. Ils locals per las radund 1200 preschentaziuns da valitaziun da jodlar, bittar bandieras e sunar la tiba sajan stads occupads fin sin l'ultima plazza. Malgrà temperaturas da record da bunamain 40 grads saja l'atmosfera stada «grondiusa» durant l'entira fin d'emna.

Cussegliera federala Baume-Schneider al til da festa

Manà il cortegi han divers chars, tranter auter dad in producent d'aua minerala, danunder ch'ins ha repartì buttiglias d'aua e chapels al public. La cussegliera federala Elisabeth Baume-Schneider (PS) ed ils cussegliers guvernativs da Basilea-Citad e da Basilea-Champagna èn medemamain sa participads, sco er il comité d'organisaziun, suandà da furmaziuns da jodladers, sunatibas e battabandieras.

Sper givlarins e tuns da tiba han surtut schumbers e piccolos da tschaiverinas e tschaiverins sco er l'applaus dal public caracterisà il maletg sonor. Ensemen han els represchentà lur usits a questa festa ch'è deditgada a l'usit svizzer. Da purtar animals è vegnì desistì pervi da la chalira.

Ord vista da las organisaziuns da salvament e da la polizia chantunala da Basilea-Citad è la festa da jodlar stada senza incaps, sco la polizia chantunala ha communitgà. La pli gronda sfida per las forzas d'intervenziun sajan stadas las temperaturas da record. Il salvament da Basilea-Citad haja perquai mobilisà equipas supplementaras per pudair dumagnar la situaziun extraordinaria.