Ina stad sco quella da quest onn pudess esser la normalitad ils proxims decennis, quai tenor climatologs da l'universitad da Berna.
Ils experts han formulà trais scenaris co las stads svizras pudessan vesair ora fin la fin dal tschientaner. En il scenari il pli nausch fiss la stad 2022 stada ina stad frestga. Quai fiss il cas sch'ins na sbassas betg a moda marcanta ils gas cun effect da serra ils proxims decennis, uschia ils climatologs en in artitgl cun il titel «Stad da chalira e stad da sitgira en la Svizra». En ils ulteriurs scenaris, sche las mesiras da protecziun dal clima vegnissen realisadas parzialmain, fiss la stad 2022 quai ch'ins savess spetgar en l'avegnir, u ina stad levamain chauda cun mesiras en favur dal clima fitg effectivas e realisadas fitg spert.
Tenor ils scenaris dal clima svizzer vegnia la temperatura er en l'avegnir a crescher fitg spert ed i vegn a dar la stad pli lungas periodas da sitgira. En general vegnia probabel a plover pli pauc la stad.
