Malgrà che la lescha federala per in provediment segir d'electricitad è vegnida acceptada cleramain da las votantas e dals votants il zercladur 2024, è la situaziun per il minister da l'ambient e da l'energia en quest sectur «nuncuntentaivla».
Svilup memia plaun
Pertge tar las energias regenerablas – tar implants idraulics, implants solars alpins ed implants da vent – avanzian ins memia plaun. «Praticamain tut quests implants èn bloccads», ha Rösti ditg mardi avant las medias. I dettia en Svizra memia paucs implants d'enviern che produceschian electricitad d'enviern.
Praticamain tut quests implants èn bloccads.
Perquai sajan impurtants ils dus decrets d'acceleraziun. Tar omadus, in per la producziun ed in per las raits, è il parlament uss londervi. Il Cussegl federal veglia cun quai «surtut scursanir a moda administrativa las proceduras», uschia Rösti. Medemamain saja la cuntraproposta tar l'uschenumnada «iniziativa da blackout» ina pitga sin la via ad in provediment d'energia segir, ha ditg Rösti. In messadi dal Cussegl federal tar l'iniziativa e tar la cuntraproposta saja da spetgar suenter las vacanzas da stad.
-
Bild 1 von 3. Bildquelle: Keystone.
-
Bild 2 von 3. Bildquelle: Keystone.
-
Bild 3 von 3. Bildquelle: Keystone.
Biodiversitad e traffic
Ultra da quai ha Rösti formulà duas ulteriuras finamiras strategicas da ses Departament federal per ambient, traffic, energia e communicaziun (UVEK). D'ina vart ina cumpensaziun optimala per la protecziun da la biodiversitad. Rösti ha numnà la segirezza alimentara, las mesiras da s'adattar a la midada dal clima ed il mantegniment da la biodiversitad cun agid da decarbonisaziun. Da l'autra vart ha Rösti formulà infrastructuras amplifitgadas optimalmain en l'entira Svizra sco finamira. Cunzunt en vista al project «Traffic 45», che vul che l'infrastructura da traffic vegnia amplifitgada fin l'onn 2045.