La Banca naziunala Svizra, la AVS u cassas da pensiun na duain betg dastgar avair aczias da firmas che fan dapli che 5% da lur svieuta cun vender material da guerra. Quai pretenda ina iniziativa dal pievel. Il Cussegl naziunal refusa la dumonda e vul er nagina cuntraproposta.
Cun 120 tar 71 vuschs e duas abstenziuns ha la Chombra gronda refusà l'iniziativa da la Gruppa per ina Svizra senz'armada ed ils giuvens verds.Ina maioritad burgaisa è da l’avis che quell’iniziativa fetschia donn a la plazza da finanzas Svizra sco er a l’industria. Verds e la PS han argumentà che la lescha ch’impedescha l’export da material da guerra haja memia bleras foras.
Er il Cussegl federal aveva refusà l'iniziativa. Tenor lez vegniss l'iniziativa ad impedir la politica d'investiziun da la Banca naziunala svizra, ha ditg il Cusseglier federal Guy Parmelin. Plinavant dettia gia in scumond da finanziar armas atomaras, biologicas e chemicas.
